第十三日
旅程既最後一天，原計劃一早係酒店退房，帶著行李去海濱幕張既OUTLET，行完再坐巴士出機場。但諗到去OUTLET對於一個無嘢要買，無嘢想買既人。噚晚就望定千葉市，究竟仲有咩紅葉景點。
 |  |
青葉の森公園：
一個係由『千葉駅』坐 20分鐘巴士去到既青葉の森公園，一個係離千葉駅行15分鐘就去到既千葉公園(即係噚日揸車去到門口都唔入去既公園)。既然對OUTLET興趣不大，又唔一定會買到嘢，說好係紅葉之旅，咁我當然係紅葉優先。
今次GOOGLE MAP居然幫唔到手，顯示話要坐大網線/川戸線，係『公園前』站下車，但問題，佢居然無說明『千葉駅』邊個巴士站上車，而幾架巴士上，也看不見任何大網線/川戸線字樣。天才從第一天，何嘗不是屎忽撞棍，巴士上無標示未試一下人生既運氣，大不了奶左野最多未跳車，見到一架應該無咩點錯既巴士就跳左上。
好好彩，天才今日又無搭錯車，又無落錯站。30分鐘後就來到青葉の森公園。至於紅葉？一兩棵都叫有紅葉呢！
| |
千葉寺：
青葉の森公園不遠處就係千葉寺，反正時間尚早而且順路，決定走一趟到千葉寺。因為時間尚早，人影都無隻，唯一就只有県指定天然記念物大銀杏陪伴我這個早上。
| |
千葉公園：
搭乘相同既巴士路線回到『千葉駅』，去埋今次旅程，最後一站既千葉公園。雖然公園紅葉不多，但就有好多幼稚園學生來左郊遊。撩下小朋友又影下周圍，又快樂地渡過一個早上。
| |
午餐時間：
午餐揀左『千葉駅』附近一間RINGER HUT既什錦炸麵(我就簡單叫佢做肉絲炒麵)，一間長崎好出名既炸麵舖(但點解去過2次長崎都無食過呢)，食埋個雪糕又係時候出機場。由『千葉駅』去成田機場有好多選擇，最平就係683円，一個鐘車程既JR成田線。
| |
回到機場：
又來到成田機場HONG KONG EXPRESS櫃位，因為而家航空公司檢查行李重量非常嚴格，我將行李重量設定為7Kg，無多1g，也無少1g。踏上航機，又係同日本講再見既時候。
| |
感想：
一個人13日既旅程，不論你以孤獨，定當比自己RELAX去睇，日本會係一個唔錯既地方。就算唔識日文，只要MOBILE上到網，有個GOOGLE TRANSLATOR同GOOGLE MAP，溝通搵路係唔會有咩問題，至少租車公司職員同我，就係用GOOGLE TRANSLATE去完成整個租車程序。
行程永遠不似預期，一個人既旅程，就要自己負責曬所有野，好玩唔好玩、搵到搵唔到、遇到意外時既後備方案，其實就係考驗緊，平時點樣對自己負責任。
係網上世界要搵東京自由行，成千上萬既資料都可以搵到。但當世界從來就係不似預期，現實改左但網上世界好多時都係唔會跟著轉。就算比你搵2023年既資料又有何用，現實就係今刻既資料，明天就可能已經不一樣。依個亦都係自由行最好玩既地方，因為當刻你根本吹佢唔脹(如果你仲係到問點解同抱怨的話)！
旅程中最重要唔係洗左幾多錢，食到咩名物，成功/失敗去到幾多個景點，或者見到震撼或者凋零既紅葉。而係係今日人生中，仲可以有能力，可以一日行到八九個鐘，上落幾十層樓梯毫無懼色。錢從來都係搵唔曬，亦唔可以帶走一分一毫。下一次既旅程，無人能保證你仲可以走到幾遠，珍惜當下先係最重要。
機動性係自由行另一個重點，一件輕便既行李，唔駛係航機去寄行李，就即係唔駛等行李(要知HK EXPRESS等行李隨時要等成個鐘以上呢！)，又可以慳返行李費用係座位/餐飲上。體力好可以揹背囊，或者我就係一個7Kg以下既行李喼，就可以推/拉唔駛成日揹著，係地鐵/火車人多上上落落就最方便。
日本搭地鐵/火車，同一個月台可能會有去唔同地點既班次，仲有特急、急行、各站停車既列車。所以用GOOGLE MAP資料既同時，都要時刻望著月台顯示版資料。但所有野都係熟能生巧，玩幾日白痴都會變成天才。
旅程前既憂慮同擔心，原來唔係你得唔得，做唔做到既問題，而係自己一開始就覺得自己唔得(其實得，或者唔得又有咩問題呢？)。人生路上有朝回望今天，我會慶幸，有今日依個屬於自己既旅程，做返一個真正自己既旅程。
| |
