第七天：
幾日前，仲諗緊四日留係東京市中心，究竟可以安排咩既節目呢？仲記得之前已經買好既京王線/井の頭一日乘車券，仲要包埋吊椅或纜車，又有猴子園入場券，仲送條毛巾比你係藥王谷溫泉用。反正錢都比左，資料顯示，高尾山紅葉今日仲要係『見頃』日子，咁我決定就唔好浪費張飛，再去一次高尾山。
 |  |
再遊高尾山：
但今日係星期六，經驗話比我知，東京所有人應該都會出曬街到。估計更好多人，會同我想法一樣，前往高尾山既行山路線。七點就食飽早餐，諗都無諗就係酒店出發，到涉谷駅利用左果張京王線一日飛。輕易就跳左上井の頭線既列車，係『明太子駅』轉返京王線直奔去『高尾山口駅』。
早幾日怕死只敢試左纜車，今日再來，人一世物一世，無可能唔試下上山吊椅。我點止怕死其實係仲有畏高呢，但本著唔試唔知身體好既精神，試一次又何妨呢。講好紅葉『見頃』既日子，但為何同幾日前好似分別不大呢？唯一係日前來到，係陰陰天換成今天陽光普照既日子。沿著之前既3號路線，很快又來到山頂。之前係山頂，見大家都唔知影咩既目標，今天就明白，昨天影雲後富士山，換成今日雲下富士山(正)。
撤離路線，除原路既3號路線，及之前行過既4號路線，仲有一條行90分鐘既6號路線(稻荷山路線)，目的地依然係『高尾山口駅』。但行到一半，就有的『中伏』同『奶嘢』既感覺，由山頂吊椅站上來，好似都無上左咁多樓梯同斜路。依條稻荷山路線所指既『高尾山口駅』，似乎係指山下纜車站既『高尾山口駅』多於一切。只係而家死我都唔會行返回頭路，果條可是一條有上無落既不歸路呢！頂硬上，90分鐘後，終於來到啱啱坐吊椅上來既地方。
| |
相模湖公園：
之前係GOOGLE MAP中，見到高尾山附近，有一個叫相模湖既地方，即係那個當年揸著架車搵唔到酒店，夜晚晚係日本嬸嬸屋企門口掉頭，去相模湖林間公園燈祭又遇著落大雨既地點。原來只係離高尾駅15分鐘左右JR火車車程。既然當年去得咁辛苦，今日地點都係眼前，最重要係，那年雖然去唔到相模湖林間公園，但相模湖公園卻有著令人吸引既紅葉，今次會唔會又同上次一樣呢？199円就可以由高尾駅去到相模湖駅，再行15分鐘就去到相模湖公園，紅葉雖然無上一次咁紅咁震撼，但都叫無令人失望。
| |
調布駅：
由相模糊駅返回高尾駅既列車，一個鐘只有兩班，望下時間仲有20分鐘或40分鐘，而家當然先食飯再講。食飽午飯充滿體力，乘坐京王線既列車，前往『調布駅』，尋找『鬼太郎』。資料話一落車，就周街都會睇到『鬼太郎』。車就落左，但街上除左人同車之外，真係一隻『鬼太郎』都唔見到有。
| |
讀賣樂園 VS 三麗鷗彩虹樂園：
搵唔到『鬼太郎』，就唔好浪費時間，決定前往距離『調布駅』不遠處既『讀賣海鷗樂園』。但無諗過既係，『讀賣樂園』同『三麗鷗彩虹樂園』係兩個不同既地方(平時明明叫左要勤力去做功課，讀賣海鷗樂園個名究竟係邊到來呢)。『讀賣樂園』要係『京王よみうりランド駅 (KO37)』落車再坐纜車，而『三麗鷗彩虹樂園』要係『京王多摩センター駅 (KO41)』落車。
| |
多摩川児童公園：
『鬼太郎』無了，樂園也無了，但我既心情絕對唔會影響到。考慮日落時間及角度，好快就係GOOGLE MAP搵到今日睇日落既地點，位於『京王多摩川車駅 (KO35)』不遠處既多摩川児童公園棒球場，人地就努力踢波打波，我就係度食風等日落，正！
| |
前往慶応仲通り商店街：
來左日本咁多日，景點食肆從來都係即興多於一切。但噚日係『慶応仲通り商店街』見到既燒肉店，我係唔會放棄既呢！食左成個鐘風等埋日落後，乘京王線轉井の頭線返回涉谷駅，星期六既涉谷駅，人流係比星期一至五更多人。東京地鐵站最常就係將幾條線既車站，擺埋同一個位，咁真有咩辦法唔塞人塞到仆街呢？
輾轉搵到山手線既入口，穿越左一大堆既人來到『田町駅』。行過隔離條街，就係『三田駅』。搵返噚日見到個間燒肉店，食到本來好想食既燒肉。但來到個餐見到點解生肉多過熟肉呢，我就開始有的後悔。但後悔從來都係無用既呢？叫左唔食，罪大惡極。叫姐姐幫手翻熱多一次塊鐵板，勉強食曬所有本來好想食既燒肉，返去就睇下今晚會唔會肚屙先(事實係無既呢)。
| |
酒店：アパホテル 品川泉岳寺駅前 (APA Hotel Shinagawa Sengakuji Eki-Mae)
〒 108-0074 東京都港区高輪2-16-30
☎ 035-475-6801
| |
