一人遊東京：第6天

第六天：

今日遇上旅程第一次落雨既日子，輕便既隨身行李，就充分發揮佢既機動性。成功走到新宿駅，踏上前往泉岳寺既列車後，路上近乎全都有瓦遮頭。將行李寄居係酒店，但而家出面落雨落到七彩。天氣報告顯示，12:00打後先會停雨，咁而家可以做D咩呢？

落雨又有咩好怕呢？

台場一日遊：

GOOGLE MAP又發揮佢既作用，今日就將行程改去台場。那裡既有商場，又有高達同埋MEGA WEB TOYOTA，點都可以打發一日既時間。由泉岳寺駅出發，一個站就到品川駅，就會有巴士(お台場レインボーバス: 02系統ヒルトン)直到台場。雖然下著大雨，但都算幾容易來到台場既フシテレビ前(アクアシティお台場)。從GOOGLE MAP中尋找MEGA WEB TOYOTA位置作出導航，得出來既訊息居然係『MEGAWEB TOYOTA城展示中心」已永久停業。』，上網尋找有關資料，原來MEGA WEB TOYOTA早在2021年12 月，不敵武肺而關閉了。

無帶遮‧‧‧

京急本線再轉巴士‧‧‧

就來到台場。

DIVER CITY：

無得去MEGA WEB TOYOTA，台場既行程都係會繼續。而家出面落緊大雨，似乎行下DIVER CITY，搵下台場高達，會係唯一既節目。高達咁高科技，當然唔怕日曬雨淋，但係好似我依類廢人，落雨真係好大件事，仲要係無帶遮係身。係DIVER CITY兜左一圈，都唔係好搵到台場高達既位置。無野做當然又走左去飲飲食食，係FOOD COURT買左個日式炒麵坐底，見對面個日本仔用電話影緊商場出面，八卦既我當然係望下有咩好野，原來FOOD COURT門口出面，就係台場高達個PAT PAT位。

商場內店舖。

搵唔到台場高達‧‧‧

最好就係去開飯。

原來FOOD COURT門口，就係對著台場高達個PAT PAT位。

狂風暴下影高達，自己都覺得痴線。

GUNDUM BASE：

係大風大雨下探台場高達，絕對係一個好好玩既節目(不論你當被玩定玩自己)，成身濕曬為左一張無人既相，係未值得呢？DIVER CITY六樓仲有間GUNDAM BASE既鋪頭，唔買都可以係入面影下相，又可以嘥返成個鐘既時間。

GUNDUM BASE內，唔買都影下。

GUNDUM BASE內。

台場一丁目商店街：

除左DIVER CITY，仲可以行下隔來『デックス東京ビーチ』既『台場一丁目商店街』，有鬼屋、美術館、懷舊遊戲同野食。鬼屋號稱係能與富士急鬼屋同在榜首一二位，800円一次其實真心唔貴同好抵玩，但要識日文即係與我無緣啦！

行完台場，係『品川駅港南口行』站搭『お台場レインボーバス：02』巴士，一個站就可以去返三田駅，但估唔到係『お台場レインボーバス：02』巴士，居然唔收PASMO或SUICA(人地個路線牌明明寫清楚)。網上世界聲稱話，一張PASMO或SUICA唔係萬能同無敵咩？科技既野果然唔多信得過，幸好從來都隨身帶有現錢，唔係真係要橫越彩虹橋了。

沒有諗會遇到‧‧‧

但就係台場遇上好靚既紅葉。

富士電視台，但我只睇到係無限既樓梯。

彩虹橋，唔知KAT KAT同CHOCOLATE過得如何呢？

台場鬼屋。

台場一丁目商店街。

東京トリックアート迷宮館內。

懷舊既遊樂場。

人地寫明唔收PASMO同SUICA，只係影左都唔睇到呢！

東京鐵塔：

傍晚五點返到酒店，諗下無可能浪費今晚既時間。望下GOOGLE MAP，最近酒店既景點，就係行38分鐘(但搭車都要22分鐘) 既東京鐵塔。從行李攞返相機，穿越了『慶応仲通り商店街』，一條兩旁有多間食肆既街道，鐵塔去唔去到好似不是問題，重要係我知道今明兩日既晚餐一定有著落了。

今次旅程去左晴空塔，去左TOKYO CITY VIEW，今日再去埋東京鐵塔。一直都認為，愈舊既觀景台或展覽台，係會睇到更多野。至少，佢唔會有間餐廳，係到霸著觀景台個VIEW，又唔會唔知係到做咩展覽活動。只不過，如果要上東京鐵塔250米既TOP DECK，係要買張特別貴既飛(1,200円 VS 3,000円)。但既然來到，又點會唔去一次(錢反正都係要來嘥既呢)。TOP DECK張飛，包你一張拍照時間及一張FREE OF CHARGE既相片，包介紹鐵塔既歷史，當然會包埋TOP DECK既入場卷。

但現實卻話比我知，250米既TOP DECK，同150米既MAIN DECK，個VIEW其實唔係差好遠。而最多人去既MAIN DECK，其實景觀同落一層既M2又唔係差好遠。但M2樓層，係唔會有人同你爭位同要等位，仲可以係餐廳買個雪糕，望著東京夜景來食。

係三樓攞左張FREE OF CHARGE既到此一遊既相片，都預計佢會有一張相係要收錢。本著支持日本經濟，1,500円都無咩所謂。但最有趣既地方，就係比錢個張相係本尊，但免費果張，你仲咩比左另一個人既相我呢？仲要係條友仔帶埋口罩慌死認到佢果隻？擺明就係唔想FREE比我呢！但諗到依類旅遊點，人地一日可能有成過萬張既相要處理，忙中有錯有咩出奇？係未攪錯一張都唔比呢？自己唔係IT來咩？IT從來都係將不可能變成可能，有時間咪做返張比自己先。